AYITI AYITI CHERI AN NOU

AYITI sa k ap pase konsa.
Tout efò nou fè – nou pa rive ka rekonèt w.
Se w kite miwa nou – se w kite reflè nou.
W paka imajine ki sa w ye pou nou.
Doulè soufrans ap dechire kè an nou.

Manman n – papa n
Te aprann nou reve gran
Pou w te ka toujou rete pi-gran pase n.
Jodi-a se tris – w pa gen wotè ni mezi.
W fin defigire – delabre – vyole – imilye.
Koz twòp koze ki kwense w la.

Malgre tout blesi – tout tristès
Lanmou nou pou w – paka etenn.
Se w – se mwen – se nou k ap trennen
Rèv yon eritaj sakre kote n pase.
Nou fatige – nou bezwen chita
Nan Lakou lakay an nou.

AYITI! AYITI !
W tounen yon dram k ap dechire kè an nou.
Plenyen rechiya dlo-je
Pap ka plante flè bon jasmen ilan-ilan.
Nou fin degrennen nan chape poul.
Avek konfyans ak konsyans
N ap kontinye vante dife
Pou n ka koule bwè yon bon kafe.

W fin defigire – delabre – vyole – imilye
Koz twòp koze ki kwense w la
Malgre tout blesi – tout tristès
Lanmou n pou w, paka etenn.

Daprè bon nouvèl
Chak maten kòk la toujou chante
Pou l rasire demen nou tout
Ka byen leve.
AYITI ! AYITI !
Se desizyon – k ap tann kouraj deside.

19 mas 2025.
Joseph Pierre Léonard
Gangan mesaje / ibo thérapeute
Bayakou reklame