DAHO-VODOU
VIV AN VERITE

Jan sa ye la – li ta trè bon – pou nou chita pale antre-nou.
San pote jijman – nou pa ka di – si tan grav ni si tan pa grav.

Kondisyon sikonstans tan – depann nan ki kote nou vle ale – pou n ka konnen ak evalye ki kote nou rive – sitou ki kote nou ye.
Pa gen pyès zòt ki ka fè evalyasyon sila nan plas nou.
Zwazo k ap bat zèl li vole – se pa fou li fou – se pou regle yon zafè li vole nan deplwaye efò bat zèl.
Tout jan sa ye – se zwazo ki konn bezwen l – ki konn sa li vle nan moman nesesite – pou l ka goute non bon gou lavi.

Ki donk – nou dwe pote yon atansyon espesyal a nou-menm pou mezire peze sa nou vo sou balans egzistans lavi ak ki efò nou dwe deplwaye pou n goute bon gou lavi.

Eske nou se moun? Eske nou pa moun?
Nou pa ka prann nou pou mouch ni pou kochon. Alewè pou Koko-rat.

Eben ! Apali papa – nou se Moun.
Pou moun nou ye – nou dwe Moun – Moun ki Moun tout bon – k ap akonpli regle zafè Moun.
Reskonsablite se chaj – ann sele jouke pote chay nou ak kouraj detèminasyon.
An n souke kò nou. Epi – nou kapab.

Men – souke kò a – mande egzije kondisyon ak regleman.
Pou n byen pran wout Chimen angajman sila – nou dwe absoliman oze – tante – fè radyografi n – pou se pa otopsi n ki fèt avan.

Avek kouraj detèminasyon :
Nou dwe souke kò n – pou n sòti nan patiraj kòmandman relijyon etranje frekan frekansite negriye esklavajis yo – ki defini nou an kolonize alyene – an kolonize idolat.

Tanke nou rete kwense nan patiraj zannimo antan kolonize idolat alyene – vle pa vle – n ap toujou viv an pariya feneyan initil devan reskonsablite eta kondisyon MOUN nou.

Pa gen lòt bagay ki libere ki liberatè – bagay sila – li rele Verite – li rele viv an otorite – viv an Verite.
Men Verite – sak gen Entelijans kouraj vanyan – vin pile l. Ayibobo!
Sa ki ka konprann ya konprann – sa ki pa ka konprann na veye sou yo. Ayibobo!

25 mas 2025.
Joseph Pierre Léonard
DAH MIHINSÉ
Le tou pwisan
Gangan mesaje / ibo thérapeute
Bayakou reklame